سەرۆککۆمار.. رەمزی بەپێچەوانەی شەپۆلەوە، مەلەکردن و سەرلێشێواویی سیاسیی کوردی باشور

 لەبەر چاوی هەمومانەو دەیبینیین، کە چۆن خۆرهەڵاتی ناوەڕاست، بە سەرەپێچێکی مێژویی خۆیدا تێپەڕ دەبێت. عێراقیش لە ناو جەرگەی ڕوداو و گۆڕانکارییەکاندایە، لێکەوتە و  ئاکامەکان و دوبارە شکڵ دانەوەش بەم ناوچە گرنگەی جیهان، بە هەر شێوەیەک بێت ، ڕاستەوخۆ ،کاریگەریی گەورەیان  بۆ سەر کۆی پارچەکانی کوردستان، ناسیۆنالیزمی کوردی و دۆزی کورد دەبێت.  گەورەیی گۆڕانکارییەکانی ناوچەکە بەجۆرێکن، کە زلهێزە ناوچەییەکانی هاوشێوەی تورکیا، سەرەڕای توانا سیاسی وسەربازی و ئابوری ییە زۆروزەبەندەکانیان، بە پارێز و تەنانەت نیگەرانی و ترسەوە، مامەڵەیان لەگەڵدا  دەکەن. هەر لە دوای حەوتی ئۆکتۆبەریشەوە، سیاسەتە ناوخۆیی و دەرەکییەکانیان بەجۆرێك ڕێکخستۆتەوە، گۆڕانکارییە چاوەڕوان کراوەکان، بە تایبەتیش هەوڵدانی ئیسرائیل بۆ دوبارە داڕشتنەوەی هاوسەنگی وجوگرافیای هێز لە ناوچەکەدا، بە کەمترین زیان بۆ سەریان بشکێتە.

 کەچی بەداخەوە، بۆ نەتەوەیەکی بێ دەوڵەت وڕەتێنراوی وەکو کورد و ناسیۆنالیزم و هێزەکانی، مەسەلەکە بەو جۆرە نییە، جۆری پەیوەندییەکان، لاوازی کارکردن بۆ هێنانەکایەی چوارچێوەی هاوبەشی کارکردن و وەلانانی بەربەستەکان، بەجۆرێکن، وەك ئەوەی هیچ بومەلەرزەیەکی جیۆسیاسی لەخۆرهەڵاتی ناوەڕاستی نەدابێت! لە کاتێکدا دەبو تەواو بە پێچەوانەوە بوایە، لەسۆنگەی لاوازی تواناکان، سنورداریی پشتیوانییەکان، گەورەیی ئەرکەکان، ناسکی دۆخ، نا هاوسەنگی هێز،  خێرایی وبەربڵاویی  گۆڕانکارییەکان، بونی مەترسی و دەرفەتی هاوکات،  بونی دۆزێکی عادیلانە وئاڵۆزییە زۆرەکانی، کەسروشتی دابەشکردن وداگیرکاریی کوردستان بۆی دروست کردوە، ئاستی خۆئامادەکردن وکۆکردنەوەی تواناکان و  کەمکردنەوەی لاوازییە ستراتیژییەکان، لەپێش هەموشییانەوە ناکۆکییە حیزبییە ناوخۆیییەکان، نەبونی ستراتیژێکی نیشتیمانی سازان لەسەرکراو بۆ روبەروبونەوەی سیناریۆ جۆراوجۆرەکان وبەرگریکردنێکی مێژویی لەمافی میللەتەکەمان، چەند قات بوایە. کەچی مەخابن دەتوانین بڵێین جگە لەو خۆنمایشکردنە شکۆدارەی شەقامی کوردیی  بۆ پشتیوانیکردن   لەرۆژئاوای کوردستان،  هیچ ئاماژەیەکی ڕاستەقینەی خۆکۆ کردنەوەو  هێزلەخۆنیشاندان،  بەدیهێنانی یەکێتی نیشتیمانیی هەر پارچەیەک و یەکتر تەواوکردنی نەتەوەیی نێوان پارچەکان لەسەر ئاستی نەتەوەییدا بەدیناکرێت؟!  واقیعی خۆ کۆکردنەوەی هێزەکانی ڕۆژ هەڵات لەم دواییانە، لەژێرفشاری روداوەکان لە چوارچێوەیەکی هاوبەشی کارکردندا، هێشتا لەوە ساواتر و لاوازترە، وەک پێوەری هەڵسەنگاندن وەری بگرین وبەکاری بێنین.

ئەم واقیعە کوردییە نەخوازراوەش، لەسەر ئاستی هەرێمی کوردستان زەقتر و ئازاربەخشترە، بە حوکمی ئەوەی لەم قۆناغەدا تاڕاددەیەکی بەرچاو، ناوک و قوڵایی ستراتیژیی دۆزی کورد و ناسونالیزمی کوردی لە پارچەکاری تریشدا پێکدە هێنێت.

هەربۆیە، هەر پاشەکشە، خوێندنەوەیەکی کرچ و کاڵ و  ڕوکەش وهەڵە، ئیدارەدانی ململانێکان بەعەقڵێکی حیزبیی  ماندو گرژو شەتەکدراو بەرابردویەکی بریندار، لێپسراوێتی لە ئەستۆنەگرتن و نا هوشیار بون بە ئەرکەکانی قۆناغە مێژوییەکە،  زیانەکانی تەنها بۆ باشور کوردستان کورت نا بنەوە، بەڵکو سەردەکێشن بۆ کۆی دۆزی کورد و کوردستانی مێژویی. کەچی سەرەڕایی ئەم ڕۆڵ وچاوەڕوانی و لەهەمانکاتدا لێپرسراوێتییە مێژوییە، هەردو  حیزبە بڕیار بە دەست و حوکمڕانەکەی هەرێم، بێ هیچ حساب  کردنێکی جدی بۆ ئەم ڕاستییە،گۆڕانکارییە گەورەکان و ئەو مەترسی و دەرفەتانەی لێیان دەکەوێتەوە،  هاوشێوەی ڕابردو، لە بازنەیەکی داخراوی بێ ئاسۆی قانگدراو بە هەستی نەرێنی و سەیرکردنی دنیاو گۆرانکارییەکان لەروانگەی  لەڕوانگەی ناکۆکی وململانێ حیزبییەکانی نێوانیانەوە،دەخولێنەوە!!

بە هەمان هەناسە،  گوتار، پاسا و تا کتیکی دە پانزە ساڵی ڕابردو، مامەڵە لەگەڵ یەکتردا دەکەن! لە  دۆخی بنبەستێکی ڕاستەقینەو نانیشتیمانیی  وئاز اربەخشی پەیوەندییەکانیاندا دەژین.ئەوەی ئەمڕۆش لە بەغدا سەبارەت بە پرسی هەڵبژاردنی سەرۆککۆمار ڕویدا، تازە ترین بەڵگە بو، لەسەر ڕاستیی و تراژیدیی  ئەم واقیعە بەرهەستەی باسمانکرد. کەبەڵگەیە لەسەر گیرخواردن لە تەنگەبەرە فیکری وسیاسی وئەخلاقییە حیزبییەکان و  کەم توانایی بۆ بەرزبونەوە بۆ ئاسۆو پانتاییە نیشتمانییە فراوانە کۆکەرەوە هیوابەخشە کوردستانییە خوازراوەکە! جیاوازی تێگەیشتن وهەڵوێست لەنێوان  دوحیزبەکەدا، دەربارەی هەندی پرس و گۆڕانکاری و هاوپەیمانێتی، گەر بۆ مێژو و ویژدانی تاکەکەسی و حیزبی گرنگییەکی هەبێت، بۆ واقیعی ئێستای باشور بەهەمان شێوە نییەو رەنگدانەوەکانیان سنوردارن. چونکە ئاکامەکان یەک شتن، بەرئەنجامەکان سێبەر دەخەنە سەر، توانا نیشتمان یەکان،  ئاستی  خۆئامادەکردن، جوڵەکردن لەچوار چێوەی ستراتیژو ئامانجی نەتەوەیی هاوبەشدا ، بەوجۆرەی ناسیۆنالیزمی نەتەوەیەکی بێدەوڵەت ومافخوراو دەیخوازێت وداوای دەکات وبەخوارئەوە قایل نییە.  هەرئەوەش پێشمەرجێکی گرنگە بۆمامە کردنێکی هوشیارانە،  لێپرسسراو و ئومێد بەخشانە لەگەڵ پێشهات و گۆڕانکارییەکاندا. 

 هەمو ئەوەش، کەیەکسانە بە  پێگەی خۆ لاوازکردن و وێنای خۆشێواندن، بنبەست و چەقبەستویی لە هەرێم، داڕوخانی زیاتری پەیوەندییە حیزبییە لەبنەرەتدا لەرزۆکەکان و نەبونی ستراتیژێکی هاوبەش بۆتێپەڕاندنی سەرەپێچەمێژوییەکە،  ئاماژەیەکی ترسناکە، بۆقەیرانێکی فکری و سیاسی و سەرکردایەتی   کەلەم روەوە لەسەر ئاستی نوخبەی بڕیاربەدەستی حیزبیی لەئارادایە. هەرئەم قەیرانەشە لەپشت  تێکچونی دیاریکردنی ئامانجە لە پێشینەکان،  سنوردارکردنی بژاردەکان،  دوبارە بەرهەمهێنانەوەی ئەو گوتار و شێواز و میکانیزم و هەوڵ و هەناسانەی ڕابردو، کە زیاد لە جارێک نەزۆکی و شکستیان خراوەتە ڕو، خۆی حەشارداوە.

 ئەگەر دۆخەکەش بەم جۆرە نەبوایە، باشور بەدەست ئەم قەیرانەوە نەیناڵاندایە،  دۆخی کورد و ناسیۆنالیزمەکەی بەگشتی و کوردستانی باشور بەتایبەتی، لەبەردەم بارودۆخێکی چارەنوسسازی هاوشێوەی ئێستای خۆرهەڵاتی ناوەراست و عێراقدا، هی ئەوە نییە، هێزە سەرەکی وبریاربەدەستەکانی هەرێم، بۆ چەندین ساڵە بەم جۆرە، رکابەری لەسەرپۆستی سەرۆککۆماری عێراقێکی نیمچە شکستخواردو بکەن. کە هەر دوێنێ بو لەوێوە سەدان موشە وفرۆکەی بێ فرۆکەوانمان ئاراستەکرا، بێ ئەوەی بونی سەرۆککۆمارێکی کوردو تەنانەت کۆی بونە وەزاری وپەڕلەمانییە کوردییەکە لەبەغدا، بچوکترین تکامان بۆبکات، یاخود چەندین ساڵە رێگربێت لەوەی موچە نەکرێتە کارتێکی سیاسی وسزای موچەخۆری ئێمەی پێنە درێت.  لەجەوهەریشدا بونی سەرۆککۆمار هێمای بەشدارییەکی راستەقینەی کورد نەماوە لەبەغدا، بەڵام بۆ چەندین ساڵە بۆتە رەمزی بونی ناکۆکییە قوڵ وبێزارکەری نێو  ماڵی کورد، کاڵبونەوەی ناسنامەو ستراتیژی هاوبەش و دابەزینی بەشدارییەکە بۆئاستی دەستکەوتی تاکەکەسی وحیزبیی، کۆتایی ئادەبونی کورد وەك گەل وخاوەن دۆزو  ئامانجی هاوبەش و بەزمانی دەستوری عێراق پێکهاتە!
فهل انتم منتهون؟

ئەبوبەکر کاروانی شارەزای سیاسیی نوسیویەتی..