هەرکەسێک کارتی نیشتمانیی نەبێت، فۆرمی خۆراکەکەی ناکرێتە ئەلکترۆنی

نەوزاد کامیل بەڕێوەبەری گشتی بازرگانی هەرێم رایگەیاندووە، بە ئەلکترۆنیکردنی فۆرمی خۆرک لە ئێستادا لە پارێزگای هەڵەبجەوە دەستیپێکردووە، لە رێگەی ئەپڵیکەیشنێکەوە کە لە مۆبایلی زیرەکەوە وەڵامی پرسیارەکان دەدرێتەوە و هەموو پرسیارەکانیش پەیوەندییان بە فۆرمی خۆراکەوە هەیە.

راشیگەیاندووە، کارتی نیشتمانی کراوەتە بنەما، ئەگەر کەسێک کارتەکەی نەبێت، ناتوانێت فۆڕمەکە پڕبکاتەوە و بەشەخۆراکی پێنادرێت تا ناسنامەکەی دەکات بە کارتی نیشتمانی.

نەوزاد کامیل دەشڵێت، لە داهاتوویەکی نزیکدا لە پارێزگاکانی سلێمانی و هەولێر و دهۆکیش، بە ئەلکترۆنیکردنی فۆڕمی خۆراک دەستپێدەکات.

هاوکات وەزارەتی بازرگانی هەرێم ڕایدەگەیەنێت، ئەپڵیكەیشنی كۆبۆنی خۆراك لە ئێستادا تەنها بۆ هەڵەبجە كارا كراوە و دەشڵێت: بۆ ئەوانەی كۆبۆنیان نییە یان خانە جیاكردنەوە دواتر بەردەست دەبێت.

وەزارەتی بازرگانی و پیشەسازی حكومەتی هەرێم لە ڕاگەیەنراوێكدا ئاماژەی بەوەكردووە، لەئێستادا ئەپلیکەیشنی پڕکردنەوەی کۆبوونی خۆراک تەنها بۆ پارێزگای هەڵەبجە کارایە و لە ئایندەیەکی نزیکدا لە پارێزگاکانی هەولێر و سلێمانی و دهۆکیش کارادەکرێت و بڵاوی دەکەینەوە.

ڕاشیگەیاندووە، بۆ ئەو هاووڵاتیانەی کۆبوونیان نیە یان دەیانەوێ خانە جیابکەنەوە یاخوود ناوی نوێ زیادبکەن، لەقۆناغی داهاتوودا ئەو خزمەت گوزارییەش چالاک دەبێت.