کۆبوونەوەکانی پەرلەمانی عێراق دەستپێدەکەنەوە

سێ رۆژی دیکە پشووی وەرزی یاسادانانی ئەنجومەنی نوینەرانی عیراق کۆتاییدێت و رۆژی شەممەی داهاتوو 12ی7 دانیشتنی ژمارە 1 دەستپێدەکات و لە کارنامەکەدا 7 پرۆژەیاسا بۆ دانگدان و خوێندنەوە ئامادەکراوە.

بەگوێرەی کارنامەکەی رۆژی شەممەی داهاتوو، ئەنجومەنی نوێنەران دەنگ لەسەر سێ پڕۆژەیاسا دەدات و خوێندنەوەی یەکەم و دووەم بۆ چوار پڕۆژەیاسای دیکە دەکات.

کۆبوونەوەکە سەعات 1:00ی پاشنیوەڕۆ بۆ گفتۆگۆ و دەنگدان و خوێندنەوەی ئەم حەوت بڕگەیە دەستپێدەکات: 

یەکەم: دەنگدان لەسەر پڕۆژەیاسای (سەندیکای پرۆگرامسازانی عیراق).

 دووەم: دەنگدان لەسەر پڕۆژەیاسای (تەندروستیی دەروونی).

 سێیەم: دەنگدان لەسەر پڕۆژەیاسای (پاراستن لە زیانەکانی تووتن).

 چوارەم: خوێندنەوەی یەکەمی پڕۆژەیاسای (یەکێتی نەخۆشخانە تایبەتەکان لە عیراق).

 پێنجەم: خوێندنەوەی دووەم و گفتوگۆکردنی پڕۆژەیاسای هەمووارکردنەوەی یەکەمی یاسای (دەستەی نیشتمانی بۆ چاودێریی ناوەکی، تیشکەوەر، کیمیایی و بایۆلۆجی).

 شەشەم: خوێندنەوەی دووەم و گفتوگۆکردنی پڕۆژەیاسای هەمووارکردنەوەی سێیەمی یاسای (قەرەبووکردنەوەی ئەو زیانلێکەوتووانەی کە بەهۆی کردەوەکانی رژێمی بەعسەوە بەشێک لە جەستەیان لەدەستداوە).

 حەوتەم: خوێندنەوەی دووەم و گفتوگۆکردنی پڕۆژەیاسای (چوونەپاڵی عیراق بۆ رێککەوتننامەی پاراستنی فیزیایی ماددەی ئەتۆم).