سێ نیشانەی سەرەکیی نەخۆشیی دڵ پشتگوێ مەخەن
2025-09-07
3108 جار خوێنراوەتەوە
لە کۆنفڕانسی تایبەت بە چاندنی دڵ لە هەولێر پسپۆڕێکی نەخۆشییەکانی دڵ هۆشداری دەدات لەبارەی سێ نیشانەی سەرەکییەوە کە رەنگە ئاماژە بن بۆ بوونی کێشە لە دڵدا و پێویستە بە هەند وەربگیرێن.
د. ئەحمەد هیمداد، پسپۆڕی نەخۆشییەکانی دڵ رایگەیاند، "نەخۆشیی دڵ سێ نیشانەی سەرەکی هەیە کە نابێت پشتگوێ بخرێن: هەناسە تەنگی، ئازاری سینگ و دڵەکوتێ." هەروەها جەختی لەوە کردەوە کە "هەرکاتێک کەسێک هەرسێ نیشانەی پێکەوە هەبوو، دەبێت سەردانی پزیشکی پسپۆڕ بکات."
سەبارەت بە هۆکارەکانی تووشبوون بە جەڵتەی دڵ، د. ئەحمەد هیمداد وتی، "زۆرترین هۆکارەکان بریتین لە هۆکاری بۆماوەیی، نەخۆشیی شەکرە، بەتایبەت جۆری 2، جگەرەکێشان و پەیڕەونەکردنی رێکارەکانی خۆپارێزی."
ئەو پسپۆڕەی بواری دڵ هۆشداریشی دا لەبارەی خواردنەوە وزەبەخشەکانەوە و ئاماژەی بەوەشکرد، "خواردنەوە وزەبەخشەکان دەبنە هۆی بەرزبوونەوەی پەستانی خوێن و ئەگەری تووشبوون بە جەڵتەی دڵ زیاد دەکەن."
|