لێدوانی نوێی نوری مالیکی لەبارەی حکومەتی نوێی عێراق

نوری مالیکی، سەرۆکی ئیئتلافی دەوڵەتی یاسا، جەختی لەوە کردەوە پێویستە حکومەتی چاوەڕوانکراوی عێراق ڕێچکەیەکی نیشتمانیی سەربەخۆ پەیڕەو بکات.

مالیکی لە پۆستێکدا لە تۆڕی کۆمەڵایەتی "ئێکس" ڕایگەیاند: "پێویستە عێراق ببێتە ڕەگەزێکی کارای هاوسەنگی لە دەوروبەری هەرێمی خۆیدا، بەو بڕوایەی کە گفتوگۆ و تەواکاریی ئابووری کورتترین ڕێگان بۆ چەسپاندنی سەقامگیری".

ئاماژەی بەوە کرد: "لەسەر ئەم بنەمایە، هیوادارین حکومەتی داهاتوو ڕێچکەیەکی نیشتمانیی سەربەخۆ بگرێتە بەر کە نەچێتە ناو هیچ میحوەر و جەمسەرێکەوە، بەڵکو کار بکات بۆ بنیاتنانی شەراکەتی نێودەوڵەتیی پتەو بەپێی ئەو ڕێککەوتنانەی کە ئاسایش و گەشەپێدانی عێراق بەهێز دەکەن و ڕێز لە سەروەرییەکەی دەگرن."

زیاتر وتی: "عێراق چاوەڕوانی پەیوەندیی هاوسەنگ و بەهێزە لەگەڵ هەمووان بێ جیاوازی، بە جۆرێک کە خزمەت بە بەرژەوەندییە نیشتمانییەکانی و سەقامگیری ناوچەکە بکات."

ڕاشیگەیاند "هێزی عێراق و ئابووری و پێگەکەی لە توانایدایە بۆ دروستکردنی بارودۆخێکی هاوسەنگ و کارلێکردن لەگەڵ هاوبەشەکاندا، لەگەڵ ڕێزگرتنی تەواو بۆ سەروەری و ئیرادەی وڵات."