قەدەغەکردنی زمانی کوردی لە ناوچە جێناکۆکەکان ناڕەزایی لێدەکەوێتەوە
11 کاتژمێر پێش ئێستا
754 جار خوێنراوەتەوە
بڕیاری قەدەغەکردنی زمانی کوردی لە پۆلەکانی ناوچە جێناکۆکەکان ناڕەزایی لێدەکەوێتەوە و داوای هەڵوەشاندنەوەی دەکرێت.
وەزارەتی خوێندنی باڵای عێراقی لە بەرواری 15 ی مانگی ٧ خوێندنی زمانی کوردی لە پۆلەکانی ناوچە جێناکۆکەکان قەدەغە کرد
ژمارەیەک رۆشنبیر و مامۆستای زانکۆ لەژێر ناوی (بانگەوازی پاراستنی رێزی زمانی کوردی لە عیراق) یاداشتنامەیەکیان بڵاوکردووەتەوە و رایانگەیاندووە:" وەزارەتی خوێندنی باڵای عیراق بەنادەستوریی و ناقانوونی بڕیاری قەدەغەکردنی زمانی کوردی لە پۆلەکانی ناوچە جێناکۆکەکان داوە و لەو رێگەیەوە خوێندکارانی کوردیزمانی بێبەش کردووە لەوەی داوای روونکردنەوە بە زمانی کوردی بکەن".
ئاماژەشیان بەوەکردووە:"ئێمە پێمان وایە بیرکردنەوەی لەم جۆرە مەترسی گەورەیە لەسەر پێکەوەژیان و هەروەها ناکۆکە لەگەڵ یاسا بەرکارەکان و بڕیارەکە ناکۆکە، لەگەڵ چەندان یاسای عیراقی فیدڕاڵ و لە سەرووی هەمووشیانەوە دەستووری هەمیشەیی، چونکە بە گوێرەی دەستوور هەردوو زمانی عەرەبی و کوردی زمانی رەسمیی کۆماری فیدڕاڵیی عیراقن و هیچ دامودەزگایەکی حکومی دەسەڵاتی سنووردارکردنی زمانە رەسمییەکانی دەوڵەتی نییە".
"ئەمە جگە لەوەی ئەو بڕیارە راستەوخۆ ئاڕاستەی زانکۆکانی ناوچە جێناکۆکەکان کراوە، کە بە گوێرەی دەستوور دەکەونە چوارچێوەی ماددەی 140 و ئەم ناوچانە کێشەی قووڵی پێکهاتەکانیان هەیە و ئەم کێشانەش پێویستییان بە چارەسەرە نەک ئەوەی بەردەوامییان پێ بدرێت و گەورەتر بکرێن، چونکە هەموو هەوڵێک و بڕیارێکی لەم جۆرە دەبێتە هۆی قووڵبوونەوەی کێشەکان لە نێوان هاووڵاتییانی کورد و عەرەبدا"، لەیاداشتنامەکەدا هاتووە.
ئاماژەیان بەوەشکرد:"ئێمە لەم بانگەوازدا، سەرباری دەربڕینی ناڕەزاییی قووڵی خۆمان و ئیدانەکردنی ئەم بڕیارە و هەر هەوڵێکی رەگەزپەرستی لەم جۆرە، داوا دەکەین بە زووترین کات و بەبێ دواکەوتن ئەم بڕیارە هەڵ بوەشێندرێتەوە و ئیدانە بکرێ و ئەو کەسانەی کە لە پشت ئەم هەوڵانەن ناچار بکرێن بۆ ئەوەی داوای لێبوردن لە هاووڵاتییان و کوردیزمانان بکەن، هاوکات یاداشتنامەکە کراوەیەو هەر کەسێکی ناڕازیی دەتوانێت ناو و ئیمزای خۆی زیاد بکات".
|