سێ هەزار وانەبێژی خوێندنی باڵا مووچەی شەش مانگی پاریان وەرنەگرتووە

نوێنەرێکی مامۆستایانی وانەبێژی خوێندنی باڵا کە ئێستا کراون بە گرێبەست دەڵێت، کرێی وانەبێژیی شەش مانگی پاریان وەرنەگرتووە. بەرپرسێکی خوێندنی باڵا دەڵێت، ئەوان رێکارەکانیان تەواو کردووە و بانکەکان دەڵێن "پارە نییە".
 
محەممەد نەجیب، یەکێک لە نوێنەرانی ئەو مامۆستایانە، دەڵێت "پار تاوەکو لە 28-10-2024 کراینە گرێبەست، تەنیا سێ جار کرێی وانەبێژیی ئەو ساڵەمان وەرگرت".
 
بە وتەی نوێنەرەکەیان، ساڵی رابردوو مانگەکانی چوار، پێنج و شەش، هەروەها مانگەکانی هەشت، نۆ و 10ـی لە ساڵی 2024 کرێی وانەبێژییان وەرنەگرتووە. مانگەکانی شەش و حەوت پشووی هاوینە بووە و کرێ هەژمار ناکرێت.
 
محەممەد نەجیب رایگەیاند: "لە زانکۆکانی پارێزگاکانی سلێمانی و هەڵەبجە بەشێکی وانەبێژان پارەی ئەو مانگانەی وەرگرتووە، زیاتر کێشەکەکە لە پارێزگاکانی هەولێر و دهۆک بووە".
 
د. توانا نەجەف، بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵای هەرێمی کوردستان، رایگەیاند: "نەدانی کرێی وانەبێژەکانی ئەو مانگانەی ساڵی رابردوو گشتیی بووە نەوەکو پارێزگایەک و دووان و ژمارەیان زیاترە لە 3 هەزار کەس، ئێمە رێکارەکانمان بۆ کردوون، زانکۆکان پارەیان کردووە بە چەک و چوونەتە بانک گوتراوە پارە نییە".
 
توانا نەجەف وتی: "دوو جۆر بودجەمان هەیە، بودجەی ئاسایی و ئەو بودجەیەی لەسەر داهات خەرج دەکرێت، کرێی ئەو وانەبێژانە لەسەر بودجەی ئاسایی بووە و بۆ دابەشکردنی رەزامەندی ئەنجوومەنی وەزیران پێویستە، بۆیە ئەوەی لەسەر ئەستۆی وەزارەتمان بووە جێبەجێ کراوە".
 
بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵای هەرێمی کوردستان ئاماژەی بەوەکرد: "دابەشنەکردنی کرێی وانەبێژان پەیوەندی بەو دۆخە داراییەی هەرێمی کوردستانەوە هەبووە، تەنیا کرێی ئەوان نەبووە و بەشێکی مامۆستاکانیش مووچەیان پێ نەدراوە".