لیژنەکەی بەغدا و هەولێر کارەکانیان دەستپێکرد

کۆبوونەوەی شاندی ئەمنی عیراق لەگەڵ بەرپرسانی هەرێمی کوردستان لەبارەی هێرشە درۆنییەکان کۆتایی هات و رایانگەیاند، ئەمڕۆ یەکەم رۆژی دەستپێکردنی کاری لیژنەکە بووە و لێکۆڵینەوەکان لە ئێستاوە دەستیان پێ کردووە.

لەبارەی کاری لیژنەکەوە قاسم ئەعرەجی راوێژکاری ئاسایشی نیشتمانیی عیراق رایگەیاند، ئیدانەی هێرشەکان دەکەن، دەبێت تۆمەتباران بدۆزرێنەوە و رەوانەی دادگا بکرێن.

باسی لەوەشکرد، لە پاشماوەی هێرشەکان وا دەردەکەوێت پارچەی تێدا بێت و لە دەرەوە دروست کرابن و بۆ ئەو مەبەستەش چاوەڕوانی ئەنجامی لیژنەی لێکۆڵینەوە دەکەن.

قاسم ئەعرەجی ئاماژەی بەوەشکرد، نازانرێت سەرچاوەی هێرشەکان یەک لایەنە یان نا، ئەوەش لەدوای دەرئەنجامی لێکۆڵینەوەکان دەردەکەون.

هاوکات، رێبەر ئەحمەد وەزیری ناوخۆی هەرێمی کوردستان رایگەیاند، ئامادەن هەموو هاوکارییەک پێشکەش بەو لیژنیەی عیراق بکەن و هیواخوازن ئەمە کۆتا لیژنە بێت و بگەنە دەرئەنجامێکی دروست.
وتیشی، هێرشەكان لە سنوری خۆی دەرچووە و نابێت دووبارە ببنەوە.

وەزیری ناوخۆی هەرێمی کوردستان راشیگەیاند، بەهۆی هێرشەكانەوە كۆمپانیاكانی نەوت كشاونەتەوە و بەرهەمهێنانی نەوت دابەزیوە.

ئەوەشی خستە روو، "پێویستمان بە کاتە بۆئەوەی كێڵگەكان بۆ بەرهەمهێنانی نەوت بگەنەوە توانای راستەقینەی خۆیان".

ئەوەش لە کاتێکدایە، لە سەرەتای ئەم مانگەوە هێرشی فڕۆکەی بێفڕۆکەوان بۆسەر کێڵگە نەوتییەکانی هەرێم بەردەوام بووە و بەهۆیەوە زیانی ماددی بەر کێڵگەکان کەوتووە.

ئەمڕۆ شاندێکی حکومەتی عێراق بە سەرۆکایەتیی راوێژکاری ئاسایشی نیشتمانیی عێراق گەیشتە هەولێر و  پێش گەیشتنی شاندەکە، دوو درۆن لە سنووری پارێزگای هەولێر کەوتنە خوارەوە. بەگوێرەی هەواڵی دژە تیرۆری کوردستان، "زیانی گیانی نەبووە."