کەمبوونەوەی دیناری عیراقی نرخی دۆلار دادەبەزێنێت

ئەمڕۆ لەبازاڕەکانی هەرێمی کوردستان، نرخی دۆلار نزمبوونەوەیەکی بەرچاوی بەخۆوە بینی، بەجۆرێک نرخی 100 دۆلاری ئەمریکی بە 139 هەزار دینار مامەڵەی پێوەدەکرێت.

فەهمی تۆفیق شارەزای ئابووری 7ROJی راگەیاند:" هۆکاری نزمبوونەوەی نرخی دۆلار دەگەڕێتەوە بۆ ئەوەی کە بەهۆی دابەشنەکردنی مووچەوە لەماوەی سێ مانگی رابردوودا دراوی عیراقی لەبازاڕەکاندا کەمبووەتەوە و دۆلار زیادیکردووە".

وتیشی " هاوکات بەشێکی تر لەهۆکارەکان دەرەکین و دەگەڕێتەوە بۆ ئەوەی لەماوەی رابردوودا ترەمپ سزای خستەسەر بەشێک لە هەناردەی کاڵای عیراقی بۆ وڵاتەکەی، هەروەها سزا ئابوورییەکانی ئەوروپا بۆ سەر رووسیا هۆکارێکی دیکەی نزمبوونەوەی نرخی نەوت و دۆلارە".

ئەوەش لەکاتێکدایە، لەماوەی سێ ساڵی رابردوودا نرخی دۆلار لەبازاڕەکانی هەرێمی کوردستان، بەوشێوەیە دانەبەزیوە و لەئەمڕۆدا 100 دۆلاری ئەمریکی بە 139 هەزار مامەڵەی پێوەدەکرێت، هەرچەندا بەراورد بە نرخەکەی لە دوێنێدا کەمێک بەرزبوونەوەی بەخۆیەوە بینیوە، کە نرخەکەی 138 هەزار و 800 دینار بوو.